Idara ya Ardhi na Maliasili ni mojawapo ya Idara za Halmashauri za Wilaya ya Kisarawe. Idara hii inaundwa na jumla ya visekta vidogo saba (7) chini ya sekta za Ardhi na Maliasili ambavyo ni: (i) Mipango Miji (ii) Usimamizi wa Ardhi (iii) Upimaji na Ramani (iv) Uthamini wa mali (v) Misitu (vi) Wanyamapori (vii) Utalii .
MAJUKUMU YA IDARA YA ARDHI NA MALIASILI
Kwa ujumla majukumu ya Idara ya Ardhi na Maliasili ni ya kutoa huduma za kitaalam na ushauri kwa wakazi wa eneo la Halmashauri ya Wilaya ya Kisarawe, wananchi wengine wa Tanzania na wawekezaji mbalimbali kutoka ndani na nje ya nchi ya Tanzania. Majukumu hayo ni kama ifuatavyo:
Kupanga, Kupima na kumilikisha maeneo ya matumizi mbalimbali ya Ardhi kama vile matumizi ya viwanja, taasisi mbalimbali, kilimo, malisho, makazi, wanyamapori nk.
Kutoa elimu ya sera na sheria mbalimbali kuhusu masuala ya Ardhi, makazi, wanyamapori, misitu na mazingira ili wananchi wazielewe na kuzizingatia wanapopanga na kutekeleza mipango yao ya maendeleo
Kudhibiti na kushauri uendelezaji wa maeneo mbalimbali ya Ardhi unaokwenda kinyume cha sheria na taratibu zinazohusika.
Kudhibiti uvunaji holela wa maliasili mbalimbali kama vile misitu na wanyamapori.
Kulinda na kuendeleza ustawi wa wanyamapori kwa kutoa leseni za kuwezesha uwindaji endelevu ili shughuli za uwindaji na upigaji picha wa kitalii ziwe endelevu.
Kukuza na kuainisha vivutio mbalimbali vya utalii ndani ya eneo la Halmashauri ya Wilaya na uwepo wa kituo cha taarifa mbalimbali za utalii ndani ya Halmashauri ya Wilaya.
